Cine de outono: Miradas Etnográficas 4

 Neste 2016 as cuartas Miradas Etnográficas do ciclo Cine de Outono botan unha ollada cara algunhas poboacións que foron anegadas para construír encoros e como se enfrontan a esta situación as xentes que viven neses lugares de Galicia, de Rusia e da China.

As proxeccións serán de balde ás 20.30 h. no Museo Etnolóxico o venres 7, sábado 8, venres 14 e sábado 15 de outubro, coa colaboración do Cineclube Padre Feijoo de Ourense e a Federación de Cineclubes de Galicia.

Nas proxeccións dos filmes galegos:"Asolagados" e "Os días afogados" contaremos coa presenza da equipa de rodaxe dos filmes, cos que manteremos un coloquio para coñecer os pormenores da rodaxe e a súa experiencia con esta realidade, que tanto mudou as vidas das persoas que habitaron estes pobos anegados polos encoros de Belesar e do Lindoso.


Venres 7 de outubro, 20.30 h.

ASOLAGADOS
(Galicia, 2013). 60'
Director: David Vázquez

Documental sobre a xente e os seus pobos (Abideira, Porto, Castro Candaz, Santa Marta, Pincelo, Ponte fortes, A Samugueira, San Paio, Mourulle, Portomeñe, A Ermida, Ribó…), anegados polo encoro de Belesar en 1963. Imaxes e sons da Ribeira Sacra e do río Miño; dos restos das casas, das adegas, das árbores… e especialmente, dos dez testemuños que viviron nestes lugares antes da construción do salto e que se viron obrigados a deixalo todo.
Xa que logo este documental fai unha posta en valor das tradicións, costumes e labores que se facían na ribeira por medio das narracións que fan os nosos protagonistas de cómo era a vida antes e cómo é agora a carón do río.
Premios:
Primeiro premio Olhares e Enquadramentos do Festival RIOSde Vila Real (Portugal).


Sábado 8 de outubro, 20.30 h.

NATUREZA MORTA "Sanxia haoren"
(China, 2006). 108'
Director: Jia Zhang Ke

Tras a construción da presa das Tres Gargantas (China) a aldea de Fengjie foi anegada e os seus habitantes realoxados nunha nova localización. O mineiro Han Sanming regresa a Fengjie, logo de 16 anos de ausencia, na procura da súa muller. Tamén a enfermeira Shen Hong está na procura do seu home na aldea.
Premios:
León de Ouro á mellor película no Festival de Venecia de 2006.


Venres 14 de outubro, 20.30 h.

OS DÍAS AFOGADOS 
(Galicia, 2015). 86'
Directores: César Souto e Luis Avilés

En 1992, a construción do encoro do Lindoso (Portugal) anegou para sempre as aldeas ourensás de Aceredo e Buscalque (Ourense, Galicia). Os seus habitantes nada puideron facer para salvar as súas terras nin os seus fogares. Sabendo que todo estaba a piques de perderse, varios veciños colleron as súas cámaras domésticas e comezaron a gravar. As súas imaxes, recollidas desde mediados dos anos 60, constitúen un valioso documento histórico e etnográfico, filtrado pola subxectividade e as vivencias familiares. Son, ao mesmo tempo, un acto de fe nas posibilidades do cinema doméstico para dar conta do tempo histórico que nos toca vivir. Máis aló do íntimo, revélanse como un retrato dos mecanismos cos que actúa o poder. A tensión entre o existencial e o político, e entre o tempo pasado e a realidade presente, condicionan unha historia que se proxecta en múltiples sentidos máis aló de si mesma.
Premios:
Premio do Público e mención especial do xurado no Festival de cine doucumental de Cádiz ALCANCES 2016.  Premio UPTOFEST á Distribución. 


Sábado 15 de outubro, 20.30 h.

ADEUS A MATIORA "Proshchaine"
(Unión Soviética, 126'). 1983
Director: Elem Klimov 


Matiora é unha illa situada na parte central de Rusia, no medio dun gran río, que será anegada para facilitar a construción dun encoro. Esta é a historia dos seus habitantes, que teñen que despedirse do seu fogar, mais non é só a historia dunha pequena aldea senón que o director presenta e reflexiona sobre un problema de dimensións históricas: o conflito entre a sociedade moderna e a sociedade tradicional.
O filme está baseado na novela de Valentin Rasputin "O adeus a Matiora" (1976).

Outono Fotográfico 2016 no Museo Etnolóxico

Este 2016 o Museo Etnolóxico participa un ano máis no Outono Fotográfico nesta edición cunha exposición de fotografía de Demetrio Monteagudo González titulada: "Fogo Sagrado: fogo, festa, rito". que se poderá ver durante todo o mes de outubro no local social "Igrexa da Madalena".

HORARIO da igrexa da Madalena:
Martes a venres de 12:00 a 14:00 h. e de 17:00 a 19:00 h.
Sábados e domingos de 12:00 a 14:00 h.
Festivos pechado

foto de Demetrio Monteagudo González

O lume é un símbolo asociado á renovación e á purificación pero tamén ao castigo infernal. Aparece moitas veces coma o eixo sobre o que xiran moitas festividades e ritos da nosa terra. A festa, ademais, é algo que só existe onde hai presenza humana e é un fenómeno cultural universal. Cumpre importantes funcións nas nosas comunidades e funciona coma reforzador da identidade propia ao revelar as tradicións dun lugar.

O fogo é obxecto litúrxico no cristianismo pero tamén protagonista dos entroidos e doutras festas. Compón un calendario ígneo que se espalla por toda Galicia artellando as súas xentes e que Demetrio Monteagudo González recolle a través do seu obxectivo.

Demetrio Monteagudo González naceu en Vigo no ano 1952, a afección á fotografía espertóuselle no ano 1973, data dende a cal mantén coa fotografía unha relación autodidacta, intermitente e bipolar que se pode permitir pola súa condición de afeccionado.

O seu obxectivo son case sempre os temas de antropoloxía social, como as festas, as tradicións relixiosas ou os traballos tradicionais. Neste senso, nunca sentiu atracción pola fotografía de estudo.

Ten obra publicada na Gran Enciclopedia Gallega e na revista Río (2000-2004), colabora en publicidade empresarial. Mostrou a súa obra en varias exposicións, entre outras: no Centro Goianés (Goián, 1984), na Asociación Cultural «Eliseo Alonso», na Casa do Libro (Vigo, 2013) ou no Centro Goianés (Goián, 2013). No ano 2014 presentou no Museo Etnolóxico. Ribadavia, «Detrás da máscara», centrada no Entroido. É membro da Asociación Fotográfica Galega (Phosgalicia).

Folleto da exposición:

Espazos sonoros 2016: Roteiro fluvial de Ribadavia a Francelos + concerto de Tres Pesos

Este ano 2016 o festival Espazos Sonoros: músicas en espazos de interese cultural desenvolve unha das súas actividades en Ribadavia, será o sábado 10 de setembro, consistirá nun roteiro fluvial de Ribadavia a Francelos e no concerto de Tres Pesos.

ROTEIRO FLUVIAL:
A xornada comenzará  as 15.00 h. co roteiro fluvial de Ribadavia a Francelos, unha ruta comentada para coñecer o noso patrimonio, a actividade é de balde mais é preciso facer unha inscrición antes do 7 de setembro.
Hora e lugar de encontro: 15.00 h, diante do Museo Etnolóxico de Ribadavia
Duración: 2 horas e media aprox.
Distancia: 8 km
Dificultade: baixa
Capacidade máxima: 70 persoas
Inscrición: do 27 de agosto ao 7 de setembro no correo: actividades@espazossonoros.org

Unha ruta que sairá do propio Museo Etnolóxico para seguir o camiño á beira do río Avia ata a pequena igrexa de San Xes de Francelos do século IX e a granxa vitivinícola de Outeiro, unha antiga explotación que data do século XII e que pertenceu aos monxes de Melón. 
Trátase, no seu conxunto, dunha paraxe de gran riqueza etnolóxica, natural e paisaxística, na que se observa unha fonda pegada da man transformadora das persoas que ao longo dos séculos traballaron e fixeron produtivas estas terras. O camiño conduciranos finalmente ata o Pociño de Francelos, as pozas naturais que forma o río Brul, tamén coñecido como río Outeiro, ao seu paso pola aldea. E de volta a Ribadavia.

Podedes ver o percorrido completo da ruta picando neste enlace AQUÍ .

CONCERTO:

Despois do roteiro a cita será ás 19.00 h. no Museo Etnolóxico co concerto do Tres Pesos música de raíz, música de hoxe.
Tres Pesos está formado por tres músicos de fonda traxectoria no eido da música tradicional: Felisa Segade na voz e percusións tradicionais, José Antonio Ferreira (Pepe de Calo) na gaita, clarinete, voz e percusións, Estevo Lamas no acordeón, voz e percusión. O proxecto nace en 2013 e sae a escena, por primeira vez, nun concerto realizado  nas festas de San Pedro do ano 2014, en Santiago de Compostela. Nese mesmo ano gravan o seu primeiro traballo, Acta fundacional, nos estudios da Radio Galega.
O concerto é de balde e non precisa inscrición.


Un anaquiño da actuación de Tres Pesos no patio do Museo Etnolóxico:

"O nacemento do violonchelo": concerto de Ester Domingo Sancho

O NACEMENTO DO VIOLONCHELO

Ester Domingo Sancho

Violonchelo barroco

                        31 de agosto ás 20.30 h. no local social da "Igrexa da Madalena" Ribadavia

Gabriël Metsu, O Violonchelista (1665) Royal Collection Trust, Londres

No concerto: "O nacemento do violonchelo" a violonchelista Ester Domingo Sancho convídanos a unha viaxe polas músicas para violonchelo solo (sen acompañamento) dos séculos XVII e XVIII, cun programa cuxa vontade específica é mostrar o descubrimento naquela época do violonchelo como instrumento solista, e o nacemento, polo tanto, dun novo ideal sonoro. Para axudar a tal propósito do xeito máis fiel posible, escoitaremos estas músicas nun instrumento que, ademais de ter sido construído no ano 1739, conserva a montaxe orixinal propia do período barroco.  

Ester Domingo Sancho é unha entusiasta da música de cámara e orquestral, é co-fundadora de diversas agrupacións (Edelmann Trio, Apollo's Cabinet, El Almacén de Música, Cuarteto Tomás de Iriarte) coas que leva a cabo unha actividade concertística internacional. Paralelamente, ten a honra de colaborar con diversos grupos de prestixio como a Orquestra do Século XVIII, a Orchestra of the Age of Enlightenment, Holland Baroque, Musica Amphion, Los Músicos de su Alteza, La Madrileña, Camerata Antonio Soler e La Guirlande, xunto a músicos e directores da talla do lendario Frans Brüggen, Philippe Herreweghe, Jos van Immerseel, Alessandro Moccia, Margaret Faultless, Kati Debretzenyi, Rachel Podger ou Lars Ulrik Mortensen.

PROGRAMA

Giuseppe Maria dall' Abaco (1710-1805)

Capriccio Núm. 3 en mi bemol maior

Capriccio Núm. 4 en re menor    

Domenico Gabrielli (1659-1690)

Ricercar Núm. 2 en la menor

Ricercar Núm. 3 en re maior

Francesco Paolo Supriani (1678-1753)

Toccata X   

Johann Sebastian Bach (1685-1750)

Suite Núm. 2 en re menor, BWV 1008:

I. Prelude

II. Allemande

III. Courante

IV. Sarabande

V. Menuet I e II

VI. Gigue

Folla de man do concerto

Un pequeno momento do concerto de Ester Domingo Sancho (que nos desculpe a gravación de baixa calidade)

Exposición: A pesca fluvial a través da colección do Museo Etnolóxico

O venres 10 de xuño ás 20.30 h. inaugúrase no Museo Etnolóxico a exposición: "A pesca fluvial a través da colección do Museo Etnolóxico"; a través de bens procedentes das coleccións do Museo Etnolóxico. Ribadavia, agás catro fotografías aportadas por particulares, abórdase a evolución da pesca fluvial a través de dúas variables que se entrecruzan; a saber, unha, os cambios que levan da pesca fluvial practicada como actividade económica complementaria, a dos «pescantíns», ata a pesca entendida como manifestación cultural, a dos «troiteiros», ao socairo das transformacións mediaombietais e da progresiva normativización da actividade.

Relatado nun discurso construído con obxectos, fotografías e textos, articulado en artes naseiras –as máis antigas e que pasan de seren feitas con materia prima exclusivamente vexetal a recibir engadidos industriais-; artes redeiras –as de máis capacidade extractiva, evolucionan do emprego de fibras vexetais cara ao plástico-; as embarcaións –o barco de dornas, característica do Miño- e as artes de liña –na que se inclúe a pesca con cana e a súa transformación coa chegada dos carretes, das materias primas industriais e dos cambios na lexislación e as alteracións no curso do río-.

Folleto da exposición tamén en castelán AQUÍ e en inglés AQUÍ

Conferencia: "As orixes do santuario Catedral de Santiago" Prof.Dr.D. José Suárez Otero

Conferencia:

As orixes do santuario Catedral de Santiago

Prof.Dr.D. José Suárez Otero

Universidade de Santiago de Compostela

Salón de Actos do Museo Etnolóxico

Rúa de Santiago, 10 RiBADAVIA

martes 26 de xullo

20:00 h

O Dr. Suárez Otero invítanos a coñecer dende o rigor arqueolóxico as orixes dun santuario da entidade da catedral de Santiago. Un século de intervencións, entre elas as dirixidas polo conferenciante, mostrarannos o apaixonante proceso que arranca a fins do século I dne, que coñece a súa apoteose no século IX cando aparece como o santuario do Apóstolo e que se consolidará como lugar de peregrinación.

José Suárez Otero é douctor en Arqueoloxía pola Universidade de Santiago. Foi Investigador-invitado do Deutsches Archäologisches Institut; entre outros proxectos coordina e dirixe a investigación e recuperación patrimonial do Monte do Facho e é coautor do The Virtual Romanesque Catedral of Santiago de Compostela coa Universidade de California-Los Angeles (UCLA).

Ciclo de cinema: Marxes Fílmicas 2016

Neste xullo de 2016 chegamos á quinta edición do ciclo de cinema: Marxes Fílmicas en colaboración co Cineclube Padre Feijoo de Ourense e a Federación de Cineclubes de Galicia.
Durante a primeira quincena de xullo os luns e mércores no patio do Museo Etnolóxico pola fresca ás 22.30 h. poderemos ver unha selección de filmes brasileiros, en versión orixinal subtituladas para o español (VSOE), grazas á colaboración Embaixada do Brasil em Madri.

Folleto coa sinopse dos filmes: 

 

 Luns 4 de xullo ás 22.30 h.

EDIFÍCIO MASTER

(Brasil, 2002) Eduardo Coutinho.

110 min.

Guión: Eduardo Coutinho.

Fotografía:  Jacques Cheuiche.

Sete días compartidos coa vida diaria das familias que habitan nun edificio, residencial en Copacabana na cidade do Rio de Janeiro , un macroedificio de 12 pisos, con 23 apartamentos por piso, en total 276 apartamentos nos que viven máis de 500 persoas. As historias que a cámara vai revelando son, entre outras, a dunha parella de idade madura que se atopou por medio dun aviso clasificado, a dunha prostituta que mantén á súa filla e a unha irmá e a dun porteiro que sospeita que o seu pai adoptivo é en realidade o seu verdadeiro pai. Entre todas van formando un panorama da actual vida urbana en Brasil, sen esquecer a dimensión política da vida persoal, marcando así o carácter universal das historias particulares.

Eduardo de Oliveira Coutinho foi un cineasta e xornalista brasileiro, considerado un dos mellores documentalistas do cinema brasileiro, caracterízase pola forma directa nos sus documentais sen a utilización de moitos efectos cun estilo minimalista e interesado nas historias da xente común.

 Mércores 6 de xullo ás 22.30 h.

TERRA ESTRANGEIRA

(Brasil, 1995) Walter Salles, Daniela Thomas.

100 min.

Guión: Marcos Bernstein, Millor Fernandes, Walter Salles e Daniela Thomas.

Música: José Miguel Wisnik.

Fotografía: Walter Carvalho.

Reparto: Fernando Alves Pinto, Alexandre Borges, Canto e Castro, Laura Cardoso, Miguel Guilherme, Tchéky Karyo, João Lagarto, Luís Melo, Fernanda Torres.

Brasil, marzo de 1990. O plan económico do goberno brasileiro de Collor empuxa ao país ao caos. A vida de Paco, un mozo estudante paulista, esborrállase coa morte da súa nai e acaba co seu soño de ser actor. Paco decide abandonar o seu país e marcharse a España, a terra da súa nai, aceptando levar antes a Lisboa un obxecto de contrabando. Alí coñece a Álex, o amor e o perigo de morrer...

O filme é unha reflexión sobre a perda da identidade no exilio. A banda sonora e a excelente fotografía en branco e negro contribúen ao clima negro que percorre o filme.

“Terra estrangeira” é unha descrición antropolóxica de realidades duras e contraditorias que usa a estética do cine negro e do documental.

  

Walther Moreira Salles Júnior director e produtor de cinema brasileiro gañou dous Óscar en 1998 co seu filme “Central do Brasil”, en 2003 o xornal británico The Guardian escolleuno como un dos 40 mellores directores do mundo.

Daniela Thomas é uma cineasta, directora teatral, dramaturga, iluminadora, escenógrafa e figurinista brasileira.

 Luns 11 de xullo ás 22.30 h.

ENTREATOS

(Brasil, 2004) João Moreira Salles.

117 min.

Fotografía: Walter Carvalho.

O director João Moreira Salles e un pequeno equipo seguiu paso a paso a campaña do candidato presidencial Luís Inácio Lula da Silva en reunións, mitins, avións, debates de TV, coa súa familia, aliados políticos e publicitarios, desde o 25 de setembro até o 28 de outubro de 2002 cando foi oficialmente elixido presidente da República Brasileira con 53 millóns de votos. Lula da Silva foi o primeiro presidente brasileiro saído das clases traballadoras ( ex-metalúrxico e líder sindical). O director filma, observa, non fai preguntas e acompaña ao candidato no público e no persoal.

“Entreatos” presenta tres vidas do mesmo home: un Lula histórico, cerca de gañar a presidencia; un Lula bromista que non perdoa a ninguén coas súas brincadeiras; e un Lula actor, consciente de que estaba sendo gravado nun momento peculiar.

  

João Moreira Salles é un documentalista, guionista e produtor, considerado un dos máis importantes documentalistas brasileiros contemporáneos.

 Mércores 13 de xullo ás 22.30 h.

ÚLTIMA PARADA 174

(Brasil, 2008) Bruno Barreto.

110 min.

Guión: Bráulio Mantovani.

Música: Marcelo Zarvos.

Fotografía: Antoine Héberlé.

Reparto: Michel Gomes, Marcello Melo Jr., Douglas Silva, André Ramiro, Anna Cotrim, Cris Vianna.

Obra de ficción que fai unha relectura do documental "Ônibus 174" realizado por José Padilha. Baséase na historia real do supervivinte, Sandro Barbosa do Nascimento,  dunha matanza de oito nenos da rúa de Río de Janeiro, perpetrada pola policía nunha igrexa de Río de Janeiro, en xullo de 1993, coñecida como a Chacina da Candelária (Masacre da Candelária). Algúns anos despois, o mozo secuestrou o omnibus 174 durante cinco horas, retendo a varias pasaxeiros como reféns.

Os personaxes centrais do filme “Última parada 174” son Mariza e Sandro. Marisa ten un bebé recén nacido que é secuestrado por un traficante de favela onde vive. Noutra parte da cidade, Sandro, aos 10 anos de idade, o fillo único dunha nai traballadora é testemuña do asasinato da súa nai por un par de asaltantes. Non é un filme sobre violencia, senón sobre as emocións humanas innatas como o amor, o odio e os celos que se desenvolven en todos os ambientes. 

Bruno Barreto empezou a facer cine coa idade de dezasete anos, convertíndose  nun dos máis famosos directores de cine en Brasil.