Un percorrido polo Museo Etnolóxico. #DIM2021

 Conmemoramos o Día Internacional dos Museos cun Percorrido polo Museo Etnolóxico.

Como fío condutor do vídeo a montaxe dunha exposición co obxectivo de mostrar a diversidade de traballos e persoal técnico que intervén no proceso e de difundir a función de conservación do patrimonio cultural que ten un museo. 

O vídeo foi producido por A&B Comunicación.

#DIM2021 #DíaInternacionalDosMuseos #DíaInternacionalDeLosMuseos

 

                 

CONCERTO DE PEDRAZA: O Músico que une tradición e innovación no noroeste peninsular.

 

   

Buscando plans para esta fin de semana? Achegádevos a gozar coa música de Luis Antonio Pedraza e Carlos Beceiro e o seu proxecto Fierro. Unha viaxe a despoboación. 

Luis Antonio Pedraza dende moi novo comezou a mirar o pasado musical achegando o seu grau de area á materia prima rescatada da tradición. Crea unha atmósfera musical propia, baseada na frescura dos sons do pasado. Trátase dunha música resistente, unha posta en valor do patrimonio musical legado polos nosos maiores.

Frautas, gaitas, voz e todo tipo de percusións latexan enérxicos nas melodías de incesante pulso vital no seu proxecto actual Fierro. Unha viaxe musical da despoboación. Nel recolle os sons metálicos xunto con Carlos Beceiro, nunha homenaxe aos poboados fortificados da Idade do ferro e a ese material ancestral. 

Luis Antonio Pedraza (Voz, flautas y gaita sanabresa, tamboril, pequeña percusió) e Carlos Beceiro(Mandola, Guitarra, Zanfoña).

Pódese escoitar un pouquiño do disco AQUÍ

O concerto terá lugar o sábado 15 de maio as 20.00h no Auditorio Manuel María na Casa da Cultura de Ribadavia do Concello de Ribadavia. Entrada libre ata completar capacidade. Observaranse as medidas de prevención establecidas na lexislación vixente ante a crise sanitaria ocasionada pola Covid-19.

Conversa "10 anos do 15M" con Alfredo Iglesias Diéguez

O 15 de maio de 2011 desenvólvense en Madrid e noutras cidades españolas unha serie de actos: acampadas, manifestacións, asembleas... que tiveron repercusión política e social a través da prensa e as redes sociais. Unha protesta para a cal as elites sociais e políticas non tiñan resposta.

Mesmo os equilibrios mantidos dende a Transición do 78 parecían en perigo; apuntando a o fin do «bipartidismo imperfecto». «O chaman democracia e non o é», «somos o 99 %». «non nos representan», son algúns dos eslóganes de entón, que perecían anunciar un discurso novo no que a poboación acadaría o protagonismo político á marxe das estruturas tradicionais.

 

Unha serie de agrupacións políticas tentaron encauzar este movemento; pero, como o movemento mesmo, a heteroxeneidade prima sobre a transversalidade.

 

O que para algúns parecía o inicio dunha revolución, dez anos despois parece ter sido metamorfoseado nunha máis das estruturas ás que, supostamente, aspiraba a superar.

Dez anos proporcionan una perspectiva suficiente para debater sobre que é/era o 15-M e que presencia ten hoxe.

 

O conferenciante é historiador, profesor de Ciencias Sociais de Ensino Secundario. Entre outras obras, coordinou o libro 15-M: o pobo indignado. Unha mirada calidoscópica dende Galiza. Laiovento. 2011, participou na obra colectiva A praza é nosa: quen constrúe a democracia, coordinada por Marcos Pérez Pena, 2.0 Editorial. 2011, co traballo "A democracia en crise" incluído no libro A praza é nosa, no ano 2014 recibiu o Premio Maruxa Mallo.

 

A conversa terá lugar o venres 14 de maio no Museo Etnolóxico as 20.00h. Entrada libre ata completar capacidade. Observaranse as medidas de prevención establecidas na lexislación vixente ante a crise sanitaria ocasionada pola Covid-19.

Saltando a tecnoloxía das redes sociais. #DIM2020

Unha proposta acaída ao tema deste ano 2020 no Día Internacional dos Museos #DIM2020 «Museos pola igualdade: diversidade e inclusión» a presentación en audiovisual da liña de traballo que o Museo Etnolóxico veu desenvolvendo dende o inicio do confinamento de 2020, motivado pola Covid_19, con centros da terceira idade, buscando superar a fenda dixital, mediante a inclusión de persoas na marxe das novas redes soiciais na actividade do Museo co envío de postais e xornais dixitais, transformados en analóxico grazas á colaboración das traballadoras/res das Residencias de Maiores. 

Esta liña de traballo de integrar colectivos diversos e abrir o Museo a grupos con máis dificultades de acceso ao patrimonio, co obxectivo de revitalizar a súa función social vén xa de 2005 co programa "Museo Aberto".

Confinamento 2020:

Enviando postais e xornais desde o Museo Etnolóxico: un novo e antiguo xeito de comunicar.

O confinamento e reclusión pola pandemia da Covid-19, afectou a toda a población, porén desdo o inicio vimos que uns dos grupos máis vulnerable era o da xente maior; debían estar máis protexidas e ailladas tamén da súa familia e inclusive dentro da propia Residencia, co que isto conleva para a saúde emocional e o deterioro cognitivo.

Desde o Museo Etnolóxico pensamos que podíamos achegar o noso gran de área para contribuír a que o confinamento fose máis aturable. Somos conscientes de que a maior parte da poboación que se atopa recluída nos Centros de Maiores da nosa contorna tiveron nalgún momento da súa infancia e xuventude relación con moitas das pezas que o noso centro custodia, pero tiñamos que evitar a contaminación que chegara do exterior.

Que fixemos?

Transformamos a información dixital contida en postais e xornais creados desde o confinamento do perosal do Museo Etnolóxico en analóxicas, coa colaboración do persoal das Residencias de Maiores participantes, que imprimiron as postais e xornais, para evitar a contaminación do exterior.

Cal era o obxectivo?

Crear postais personalizadas coa imaxe de obxectos de fondos custodiados no Museo Etnolóxico e achegarlle a cada persoa que se atopa nunha Residencia de Maiores unha parte do seu patrimonio e establecer unha comunicación emocional dende o exterior e suscitando ao mesmo tempo a lembranza e a reminiscencia.

Como foi o proceso?

O persoal do Museo, teletraballando, recolleu imaxes e información das súas bases de datos dixitalizadas e recreounas en forma de postais dixitais dirixidas directamente a unha persoa, coa imaxe dun obexecto e cun selo pertencente aos fondos do Museo, acompañado dun texto con información. Os obxectos e a información foron seleccionados adaptándose as características da xente que ía recibir as postais, previo contacto co persoal das Residencias que nos facilitaron datos dos residentes. O mesmo proceso se fixo coa creación do xornal dixital.

O persoal das Residencias de Maiores participantes: Fundación Hospital Asilo Nosa Señora dos Anxos (Ribadavia) e o Centro de Día/Vivenda Comunitaria de Vilar de Santos transformaron as postais dixitais enviadas por correo electrónico en postas analóxicas en papel que foron entregadas de forma individual a cada residente. A colaboración do persoal dass Residencias foi fundamental para esta transformación pois había que coidar moito todo o que chegaba do exterior para non provocar contaminacións innecesarias.
Agradecer á Residencia Xeriátrica Quercus de Leiro que se sume a participar neste proxecto.

Moitas a grazas a VisualQ pola produción do vídeo.

Día Internacional dos Museos 2019 #DIM19

Cada ano desde 1977, celébrase no mundo enteiro o Día internacional dos museos ao redor do 18 de maio. Este día é a ocasión para concienciar ao público en xeral sobre o papel dos museos no desenvolvemento da sociedade. O Comité consultivo do ICOM define o tema deste evento que, dado o gran número de países participantes, organízase nun día, un fin de semana, unha semana ou un mes enteiro.

O lema para este ano 2019 do Día Internacional dos Museos é: "Os museos como eixes culturais: o futuro da tradición", "creando tradicións que terán novos significados para as xeracións futuras".

Esta efeméride internacional tenta resaltar as funcións dos museos: recolección, conservación, comunicación, investigación, exhibición e especialmente a de servizo á sociedade e a súa diversidade.

O Museo Etnolóxico programou diferentes actividades ao longo deste mes de maio:

Día Internacional dos Museos 2018 #DIM18

Cada ano desde 1977, celébrase no mundo enteiro o Día internacional dos museos ao redor do 18 de maio. Este día é a ocasión para concienciar ao público en xeral sobre o papel dos museos no desenvolvemento da sociedade. O Comité consultivo do ICOM define o tema deste evento que, dado o gran número de países participantes, organízase nun día, un fin de semana, unha semana ou un mes enteiro.
O tema do Día Internacional dos Museos do 2018 será “Museos hiperconectados: Enfoques novos, públicos novos”. O obxectivo do Día Internacional dos Museos é sensibilizar ao público sobre o feito de que “Os museos son un medio importante para os intercambios culturais, o enriquecemento de culturas, o avance do entendemento mutuo, a cooperación e a paz entre os pobos”.

Para conmemorar esta data o Museo Etnolóxico reúne unha serie de actividades durante todo este mes de maio e parte de xuño, establecendo unha hiperconexión coa música tradicional, co patrimonio natural, co patrimonio etnográfico e co patrimonio histórico-artístico con obradoiros, concerto, visita teatrilazada e visitas a museos e sitios arqueolóxicos.

11.05 VENRES
Obradoiro de percusión con Paulo Silva
Visita guiada ao núcleo histórico de Ribadavia
e ao Castelo dos Sarmiento
Visita ao Bosque Ridimoas
Actividades para os centros:
CEIP Tomás de Lemos (Ribadavia)
CPI O Toural (Vilaboa)

18.05 VENRES
Concerto de Cantaralai no patio do Museo | 20.30 h
Noite Branca: visita teatralizada
ao Museo Etnolóxico | 22.00 h
Todos os públicos

19.05 SÁBADO
Visita á Casa Museo do Chocolate de Teimende
Visita ao Museo Taller de Olería de Niñodaguia
Visita ao Mosteiro de San Pedro de Rocas
Todos os públicos. Bus saída de Ribadavia ás 14.00h. do Castelo dos Sarmiento, Ourense ás 14.30h. do Parque de San Lázaro

09.06 SÁBADO
Chegada a Chantada 11:30 h
Visita á igrexa de Santa María de Pesqueiras
Visita á igrexa de Santa María de Nogueira de Miño
Xantar en Chantada* 15:00 h
Visita ao Ecomuseo de Arxeriz
Visita Centro do Viño da Ribeira Sacra
Todos os públicos.  

Bus saída de Ribadavia ás 10.00h. do Castelo dos Sarmiento, Ourense ás 10.30h. do Parque de San Lázaro. Regreso a Ourense sobre ás 20.30, a Ribadavia sobre ás 21.00 h.

*Temos a posibilidade dun menú [entrante, carne ou pescado, sobremesa, pan, auga ou viño] por 15,00 € por persoa, ou cada persoa pola súa conta.

Todas as visitas son guiadas.

23.06 SÁBADO
Visita ao Museo da Limia
Visita ao Museo Galego do Entroido
Visita ao Castro de Armeá e
Santa Mariña de Augas Santas
Todos os públicos

Condicións das visitas:
a viaxe en autobús con saída e chegada a Ribadavia e cunha parada en Ourense é de balde.
Non se inclúen os gastos persoais e, de ser o caso, as entradas aos centros que se van visitar.
Os amigos do Museo Etnolóxico teñen entrada gratuíta en todos os centros que se van visitar.
As prazas das visitas son limitadas.
Para máis información e para inscribirse: 988 788 720, mu.etnoloxico.ribadavia@xunta.gal

FOLLETO:

Día Internacional dos Museos 2017 #DIM17

O Consello Internacional de Museos ICOM propón para celebrar o Día Internacional dos Museos (18 de maio) neste ano 2017 o tema: Museos historias controvertidas: decir o indecible nos Museos co obxectivo de sensibilizar ao público sobre o feito de que os museos son un medio para o intercambio e difusión de todo tipo de culturas.
Para conmemorar esta data o Museo Etnolóxico reúne unha serie de actividades durante todo este mes de maio, que vén sendo tradicionalmente o mes dos Museos.

05/05/2017

20:00 h: Presentación do catálogo «A pesca fluvial a través da colección do Museo Etnolóxico»

Catálogo das pezas integrantes da colección de pesca do Museo Etnolóxico, con textos de Víctor Castro Carballal, María José Ruíz Vázquez e Sara Costa Muñoz e fotografías de Santi M. Amil, Miguel Piñeiro, Pablo González, Hércules de Ediciones, Marqués de Santa María del Villar e Mila Rodero.

06/05/2017

12:00 h: Apertura da exposición temporal «Vivir da terra. A loita do campesiñado galego (1925 – 1975)», na que o grupo de investigación HISTAGRA da Universidade de Santiago de Compostela ten plasmado o resultado dos seus traballos sobre a conflitividade xerada polas transformacións socioeconómicas nos dous cuartos centrais do século XX.

09/05/2017

20:00 h: conversa no Museo Etnolóxico «Museos, escola e memoria social da Galicia do século XX: algunhas reflexións a partir da exposición Vivir da terra. A loita do campesiñado galego (1925 – 1975)» con Raúl Soutelo Vázquez e Daniel Lanero Táboas.

Coa colaboración do Concello de Ribadavia.

12/05/2017

20:00 h: presentación e conversa sobre o libro «Non des a esquecemento» co seu autor Jose Luis Bará Torres. A presentación será feita por Xosé Carlos Sierra Rodríguez.

17/05/2017

O Museo Etnolóxico en Raigame. O Museo Etnolóxico participa na XVI Romería Etnográfica Raigame coa proxección de dous filmes, nun cine rural improvisado no baixo dunha das casas da vila de Vilanova do Infantes, que lle chamaremos "Cine Carlos Velo: 

«Galicia 1971» (Galicia, 1971) 30' de Josep Granés que se proxectará pola mañá ás 11.30 h e pola tarde ás 18.00 h.

O filme recolle unha viaxe de turismo familiar por Galicia no ano 1971 da familia do fotógrafo catalán Josep Granés í Hostench. Percorren lugares coñecidos das provincias da Coruña e de Pontevedra, nas que vai filmando monumentos e patrimonio artístico, á vez que as tradicións e costumes de Galicia,a banda sonora son cancións galegas.

«Festa, trabalho e paõ em Grijó da Parada» (Portugal, 1974) 35' de Manuel Costa Silva proxectarase pola mañá ás 12.30 h.

Esta mediametraxe é un dos primeiros documentais do Novo Cinema portugués que se insere na práctica da antropoloxía visual. :Mistura as antigas tradicións dos «caretos», personaxes mascarados, típicos das festas do ciclo de inverno e do ciclo de primavera, coa realidade cotiá da vida rural dos anos setenta do S. XX en Grijó de Parada, unha aldea do nordeste trasmontano, perto de Bragança. 

Coa colaboración do Centro de Cultura Popular Xaquín Lorenzo e o Cineclube Padre Feijoo. 

0: O CARRO E O HOME (Galicia, 1941), 11’ 18.00: GALICIA 1971 (G

18/05/2017

Día Internacional dos Museos. 

Público en xeral: Xornada de portas abertas no Museo Etnolóxico.

Asociaciación de Amigos do Museo: visita guiada a Sala de Reservas do Museo (A Veronza) , sairemos ás 11.30 h da sede do Museo na rúa Santiago, 10.

19/05/2017

foto Alberto Uyarra

22.00 h: Noite Branca dos Museos. Concerto «Músicas para manivela» (zanfona, caixa de música programable, rolmónica cromática, live looping) con Germán Díaz.

"Germán ten non só a habilidade de espertar emocións durmidas senón que ademais as veces chega a paralizarnos o pulso coa delicadeza emocional que expresa mediante os seus instrumentos de manivela". O Club de Jazz Carlos Pérez Cruz.

Despois do concerto haberá unha visita nocturna ao Museo Etnolóxico.

24/05/2017

20:00 h: no patio do Museo «Concerto de coro e conxunto instrumental» do Conservatorio Profesional e Escola Municipal de Música de Ribadavia.

Acto do Conservatorio Profesional e Escola Municipal de Música de Ribadavia.

26/05/2017

11:00 h: no patio do Museo funk, rock, jazz e world music co Grupo Grüvzilla Paulo Silva, batería; Luke Jennings, guitarra, e Antón Torronxto Fernández, baixo. A música deste trío é o resultado das achegas dun brasileiro, un inglés e un galego que soa ao que eles chaman groove ou a liberdade do jazz.

Coa colaboración do CEIP Tomás de Lemos de Ribadavia.

Folleto do Día Internacional dos Museos

Folleto de man das actuacións musicais do DIM 2017

Día Internacional dos Museos 2016 #DIM16

Como cada 18 de maio os museos de todo o mundo celebran o Día Internacional dos Museos a proposta do Consello Internacional de Museos (ICOM) para este ano 2016 é Museos e paisaxes culturais , ademais este ano o Museo Etnolóxico fai 30 anos que abriu as súas portas ao público un 18 de maio de 1986, por estes dous motivos do 15 ao 20 de maio temos varias propostas culturais para festexar estes eventos, entre os que tamén está a Noite do Museos:

15 maio

12:30 h Patio do Museo Etnolóxico. Concerto do quinteto de vento «Airas Ensemble». O MER invita á cidadanía a celebrar os seus 30 anos aberto ao público con este grupo de cámara formado por novos músicos galegos e integrantes das formacións orquestais NDR Radiophilarmonie de Hannover, Orquesta Sinfónica de Bilbao, Real Filharmonía de Galicia, European Chamber Ensemble e Orquestra Sinfónica Vigo 430. 
Contacto do quinteto en twitter @airasensemble e no seu facebook.

Programa do concerto: 

Quinteto de viento en La Maior, de Carl August Nielsen

O Quinteto para frauta, óboe, clarinete, trompa e fagot, op. 43, foi composta a principios de 1922 en Gotemburgo, Suecia, onde se estreou na casa de Herman e Lisa Mannheimer en abril de 1922. A súa primeira interpretación pública foi o 9 de outubro 1922 no Odd Fellows Mansion en Copenhaguen.

La cheminée du roi René, suite de Darius Milhaud

Suite adaptada da música escrita por Darius Milhaud en 1939 para a película Cavalcade d'amour, de Raymond Bernard. Transcorre no século XV na corte do rei René de Anjou e conta tres historias de amor con música de Milhaud, Honegger e Désormière. Milhaud estaba fascinado polo castelo e a corte de René de Anjou, situados no seu Aix-en-Provence natal.

Belle Epoque in Sud-America, suite de Júlio Medaglia

A música popular aflora nesta obra do compositor, director e adaptador, particularmente de música para películas e TV, Júlio Medaglia (São Paulo 1938). É esta probablemente a súa obra máis coñecida; composta para o Blaserquintet da Filarmónica de Berlín, e na que evoca tres das danzas máis populares de Sudamérica: o tango porteño, o valse crioulo e o «chorinho» brasileiro.

18 maio 

11:00 h Salón de Actos do Museo Etnolóxico. Proxección do documental «À Propos de Nice», de Jean Vigo; con interpretación musical en directo de Carlos Quintá. Sesión escolar.

En À Propos de Nice Jean Vigo, coa colaboración na cámara de Boris Kauffman, logra, a través do que el chama o «Punto de vista documentado», unha persoal aproximación á paisaxe social da cidade de Niza dos anos vinte do século pasado. Concebida como unha película muda, Marc Perrone crea unha banda sonora a partir da música  composta por Maurice Jaubert para L’Atalante. Á banda orixinal engádenselle pezas breves da vangarda.

20:30 h Salón de Actos do Museo Etnolóxico. Proxección do documental «À Propos de Nice», de Jean Vigo; con interpretación musical en directo de Carlos Quintá. Sesión adulta.

20 maio 

Noite dos Museos. O Museo Etnolóxico únese á celebración da Noite Europea dos Museos mantendo abertas as súas portas ata a 01:00 h, a modo de suxestión para reflexionar sobre o papel do Museo e da cidadanía na protección da Paisaxe Cultural. Entre as 20:30 h e as 24:00 van ter lugar visitas teatralizadas nas salas da exposición Seguindo o Fío.

Os Museos da Xunta de Galicia teñen programadas moitas actividades para celebrar esta data, que van máis alá do propio día 18 de maio, podedes consultalas nesta enlace AQUÍ

Día Internacional dos Museos #DIM15

Cada 18 de maio celébrase en todo o mundo o Día Internacional dos Museos, para a edición 37 deste ano 2015 o tema proposto polo Consello Internacional de Museos (ICOM) é: "Museos para unha sociedade sostible".
Os museos tentan facerse máis visibles nesta data, ainda que todos queremos que calquera día sexa un bo día para visitar un museo e participar nas súas actividades.

Durante o mes de maio o Museo Etnolóxico vai facer unha serie de actividades co alumnado de distintos centros educativos do Ribeiro, ao redor das distintas miradas que se poden proxectar sobre a fotografía, e empregar as fotografías como material educativo. Ademais de aproveitar estas actividades para dar a coñecer entre a xente moza o importante arquivo fotográfico do Museo Etnolóxico, e mostrando a necesidade de conservación por parte de todas as persoas de documentos tan fráxiles como as fotografías. 

Folleto das actividades:

Día Internacional dos Museos 2014 #DIM2014

 Este ano 2014 o Día Internacional dos Museos (18 de maio) ten como lema: "Museos: as coleccións crean conexións", nos meses de maio e xuño o Museo Etnolóxico establecerá conexión entre o alumnado, o profesorado e a colección fotográfica do Museo a través de obradoiros utilizando o material elaborado pola área de didáctica: "Escribimos coa luz" que se pode utilizar como uso nas aulas nas diversas especialidades e materias: ciencias da natureza, ciencias sociais, nas diferentes materias artísticas ou nas matemáticas, os fondos fotográficos como valioso recurso educativo.

Para os obradoiros utilizaranse as fotografías da exposición: "A mirada dos espazos. Camiño dunha antropoloxía visual" onde se mostran as obras dos fotógrafos con fondos no Museo Etnolóxico, a través das súas fotografías o público observa todo o que unha imaxe pode ensinar, as múltiples miradas: mirada técnica, histórica, socilóxica, etnográfica, artística...


Os centros educativos que participan son: IES O Ribeiro (Ribadavia), IES Ferro Couselo (Ourense), IES Celso Emilio Ferreiro (Celanova), CEIP Otero Novas (Cortegada), CEIP San Marcos (Cartelle) .

Este é o folleto coa descrición e obxectivos dos obradoiros:

O MUSEO ETNOLÓXICO NO DÍA INTERNACIONAL DOS MUSEOS (18 DE MAIO DE 2013)

        Para conmemorar este día o Museo Etnolóxico preparou varias actividades, ao longo desta semana, que terán como centro de atención aos escolares do Ribeiro e nelas participarán arredor de cen estudiantes de primaria procedentes do CEIP de Quins (Melón), do CPI Tomás de Lemos (Ribadavia) e do CEIP Pena Corneira (Carballeda de Avia).

PROGRAMA

18 DE MAIO 2013 - DÍA INTERNACIONAL DOS MUSEOS

MUSEOS (memoria + creatividade) = PROGRESO SOCIAL

Mércores 15 DE MAIO: 10,00 H.

CONTACONTOS MUSICADO “OLA RÍOS OLA FONTES”

Miguel Alonso Diz e Xesús Andrés Tejada (músico)

Duración: 1 hora

 Ola ríos, ola fontes é unha achega a Rosalía de Castro dende a recreación dunha terra, a nosa, chea de poesía, maxia e música que pousa no corazón dos nenos imaxes onde a natureza e os animais da nosa terra teñen un lugar importante. A idea desta actividade é que os nenos coñezan a Rosalía dun xeito divertido, conxugando música, poesía recitada e unha peza de vídeo.

 Mércores 15 DE MAIO: 11,30 H.

O GALO QUIRICO E OS SEUS AMIGOS

Viravolta Títeres

Duración: 1 hora

Este espectáculo de marionetas con teatriño de cartón e música en directo basease nun texto de Bernardino Graña que fai unha versión do conto popular do Galo Quirico.

Xoves 16 DE MAIO: 11,00 H.

CONTACONTOS MUSICADO “OLA RÍOS OLA FONTES”

Miguel Alonso Diz

Duración: 1 hora

Sábado 18 DE MAIO

Os adultos que visiten o Museo acompañados dun menor de idade serán agasallados cun catálogo das coleccións do Etnolóxico.

Horario sábados: 11,00-14,30 h.

PROGRAMA DO DÍA INTERNACIONAL DOS MUSEOS EN PDF

CONCERTOS DIDÁCTICOS NO MUSEO ETNOLÓXICO PARA O DÍA INTERNACIONAL DOS MUSEOS

18 de maio de 2012: Día Internacional dos museos
“Museos nun mundo cambiante. Novos retos, novas inspiracións”

16 de maio : concertos didácticos a cargo de Lois Mouriño

Hora: 10 e 11,30

Participantes: 100 alumnos de 5º e 6º de primaria do CPI Tomas de Lemos (Ribadavia)

                             

                     A través desta actividade o artesan e músico Lois Mouriño busca divulgar entre os rapaces a música tradicional galega. Realiza unha pequena explicación sobre os compoñentes e o proceso de construcción dos instrumentos tradicionais mais importantes, e exlica as diferencias entre a música folk e a tradicional. Tamén fala sobre os músicos e grupos representativos de este tipo de música como as pandereteiras, o gaiteiro solista, os cuartetos de gaitas, os requinteiros e as murgas.

Os instrumentos que inclúe nestes concertos didácticos son: voz, tamboril,  bombo, pandeireta, pandeiro, pandeira, conchas, tarrañolas, castañuelas, gaitas en diferentes tonalidades, requinta, pito galego, clarinete, acordeón, trompa e birimbao.

25 de maio: PERCUSONS: concertos didácticos da percusionista Lorena Negreira

Hora: 11
Participantes: 50 alumnos de primaria do CEIP Carmen García Carrasco (Cenlle)

                                    
                         

                     Con esta actividade musical de percusión se pretende afondar noas posibilidades do corpo como human como obxecto de percusión. A vida diaria está marcada por unha serie de ritmos ao noso alcance e co noso corpo podemos acompañar eses ritmos e mesmo cancións e así levaremos aos rapaces a diferenciar estilos como rock, pop, ritmos latinos, africanos, e música tradicional galega.

Para sensibilizar aos rapaces co cambio climático ensinaráselles a facer instrumentos de percusión con materiais de refugallo presentes en todos os fogares.

Se mostrarán así mesmo o diferentes tipos de instrumentos de percusión: caixa, djembé, maracas, triángulo, etc.

Por último farase unha performance na que participaran todos os alumnos como unha banda musical con interpretación de varias cancións.

NOTA DE PRENSA CONSELLERÍA DE CULTURA, EDUCACIÓN E ORDENACIÓN UNIVERSITARIA

NOTA DE PRENSA