Museo Etnolóxico Ribadavia

Museo Etnolóxico Ribadavia
Vista do patio interior do Museo

jueves, 24 de noviembre de 2022

Nova Web do Museo

 








Hoxe anunciamos que o Museo Etnolóxico conta con nova web. 

Nela poderedes acceder a información básica do museo, pero tamén as actividades, exposicións e novedades vinculadas ao museo. 

Agardamos que vos guste e que a atopedes de utilidade

https://museoetnoloxicoribadavia.xunta.gal/gl


 


viernes, 8 de abril de 2022

Sacoponchos de entroido

  



    Educar no respecto o medio ambiente, e facilitar o seu coñecemento, é sen unha das principais funcións dos museos na actualidade. O Museo Etnolóxico,  aproveitando a celebración de Entroido quixo dar a coñecer un dos réptiles máis ameazado da fauna galega: un sapoconcho (tartaruga). Coñecido comunmente como galápago europeo e cientificamente como Emys orbicularis, este animal habita o río que atravesa a vila de Ribadavia ( río Avia ) e o seu veciño, o río Arnioa.

    Pablo Rodríguez Oitabén, un dos fundadores da Asociación Cultural de Ridimoas, foi o encargado de despertar as conciencias ao informar que dez especies de animais desapareceran da Lagoa en tan só dez anos con respecto a catalogación feita por el en 1993. Tamén explicou que un dos principais riscos da desaparición dos galápagos europeos son os sapoconchos californianos, unha especie que moitos xente ten como mascota e que o seren liberados no río convértense en especie invasora e prexudicial para o hábitat do Avia. Este tipo de cuestións foron as que lles transmitiu Cesar Ayres, o herpetólogogo encargado de dar a charla, os cativos no CEIP Plurilingüe de Ribadavia antes de iniciar os talleres de Entroido. Labor que foi levada a cabo por Rocío Estevez, quen se ocupou de que os traxes de sapoconchos europeos reproducíranse cas típicas manchiñas amarelas características desta especie.

                                       

    Como complemento á actividade e asesorados pola Asociación Ridimoas, realizáronse unhas reproducións doutros animais veciños deste sapoconchos co fin de que os nenos e nenas coñecesen a fauna que lles rodea. 


    Durante case un mes os escolares, aprenderon os nomes dos animais que viven ou vivían na Lagoa de S. Cristovo e outras moitas cousas. Grazas a inestimable colaboración de Sara e Manolo; os seus profesores, compuxeron cancións e poemas e incluso idearon unha coreografía ca que deleitaron a familiares e público tras o desfile de Entroido do CEIP polas rúas da vila. A actividade rematou no Museo Etnolóxico onde os rapaces e rapazas ,convertidos nos Sapoconchos de S. Cristovo, demostraron todo o aprendido.

Aquí vos deixamos o acceso ao vídeo:  https://youtu.be/ZU0gzZqQ4Do

miércoles, 10 de noviembre de 2021

FÁBULAS DE ALMADA NEGREIROS

 



    A exposición “Fábulas de Almada Negreiros” chega ao Museo Etnolóxico. Reunindo 49 tintas chinesas orixinais, realizadas en 1936 para ilustrar o libro Fábulas do escritor e xornalista Joaquim Manso, con dirección gráfica de Luís de Montalvor (codirector de Orpheu)é representativa da profunda simbiose coa escritura e o talento gráfico de Almada Negreiros. Tamén se mostra un reducido e delicado elenco de ilustracións deseñadas para O Pórtico e a Nave (1943), obra do mesmo autor e editor, con quen Almada se asocia para outras publicacións alternativas e excepcionais.

    Almada Negreiros (1893-1970) é o referente imprescindible da cultura portuguesa do século XX –xunto con Fernando Pessoa e Amadeo de Souza-Cardoso–, desenvolvéndose ao longo da súa vida en múltiples áreas (foi poeta, debuxante, pintor, novelista, bailarín, coreógrafo, dramaturgo, ensaísta, escenógrafo, escultor, gravador, contista, tapiceiro, vitralista, conferenciante...) e cuestionándose constantemente as fronteiras entre as artes. Inspirado polas correntes artísticas innovadoras do seu tempo, entre as que atopamos nomes coma Marinetti, Diaghilev, Delaunay Apollinaire, Picasso Matisse, Jean Cocteau, Brancousi, Erté, e Erick Satie e Stravinski; a súa experiencia cosmopolita en España (1927-1932) foi prolífica. Aquí coincidiu con intelectuais e artistas de diversos ámbitos como García Lorca, Ortega e Gasset, Buñuel ou Gómez de la Serna, quen o introduciu neste círculo como «o ser impar no medio da pintura e da literatura portuguesa, sobre as que salta de trapecio en trapecio».

    Nesta exposición atopamos un conxunto de gran riqueza plástica que constitúe un eloxio á liña e ao virtuosismo artesanal do debuxo, manifestación que ocupa o lugar central na súa produción, desde a infancia ata a súa última obra.

    A rá e a flor, emblemática composición da portada de Fábulas, é o punto de partida para unha viaxe extraordinaria polo universo da arte de contar historias a través de imaxes, onde reencontrarnos con clásicos que atesouran a nosa infancia –A cigarra e a formiga, O burro con pel de león, O reiseñor e a andoriña, O elefante e o colibrí– a par doutros personaxes fascinantes.

    Visitantes de todas as idades teñen así a oportunidade de descubrir unha aproximación absolutamente orixinal a un xénero que forma parte do patrimonio cultural da humanidade.

Animádevos!

martes, 9 de noviembre de 2021

IX MIRADAS ETNOGRÁFICAS: OURENSE


 Se buscades plan para os sábados de Novembro chega "IX MIRADAS ETNOGRÁFICAS" 

As proxeccións terán lugar na Casa de Cultura de Ribadavia os sábados ás 19:00h. A entrada é de balde e ata completar capacidade. 

Deixamos por aquí as sinopses das filmes para que podades botar unha ollada. 


6 de novembro: “Entre pastores e lobos” de Manuel Pedrosa.
Sinopse: No noroeste da Península Ibérica, vive unha das maiores poboacións de lobos de Europa. Acubillados por paisaxes singulares, os lobos non ocupan illados espazos naturais. Viven entre a xente.

13 de novembro: “Manoliño Nguema” de Antonio Grunfeld.
Sinopse: Marcelo Ndong, un artista africano formado en España, rexenta agora en Malabo unha gardaría cando recibe unha inesperada proposta: montar unha obra de teatro que o regresará a Galicia.

20 de novembro: “Cesteando” de Plácido Romero.
Sinopse: A traxectoria vital de Toño “ou do cesteiro” marcouna el mesmo cesteando e entrelazando, con tesón a valentía, moi diferentes vivencias, loitas e duros traballos que conformaron unha exitencia presidida por principios, para el incuestionables, como a rebeldía, a liberdade e o profundo amor pola súa terra.

27 de novembro "Pelegrinaxes" de Simone Saibene.
Sinopse: Luzía, unha investigadora licenciada en audiovisual percorre as oito etapas do camiño entre Ourense e Santo Andrés de Teixido para rematar un proxecto iniciado na universade cun amigo morto sobre un libro de viaxe. Inspirado no libro de viaxe de Ramón Otero Pedrayo.

Observaranse as medidas de prevención establecidas na lexislación vixente ante a crise sanitaria ocasionada pola covid-19

Ciclo de conferencias "San Ciprinao o Mago. De oracións, ciprianillos e tesouros"



 


    Permanece aberta ata decembro de 2021 a Exposición «San Cipriano o Mago: de oracións, ciprianillos e tesouros» organizada polo Museo Etnolóxico de Ribadavia, Xunta de Galicia e o Xacobeo 2021, con máis de 150 obxectos da colección particular de Félix Castro Vicente (Arquivo Castro Vicente), con montaxe de Xosé Lois Vázquez e Disigna Edenia, e fotografías de Mark Ritchie.
Con este motivo organízase un ciclo de conferencias que pretende afondar nalgúns dos aspectos dos catro ámbitos da Exposición (San Cipriano o Santo; San Cipriano o Mago; a busca de tesouros, e San Cipriano no mundo).






    «San Cipriano» de Antioquía como santo mago convertido ao cristianismo ofrécenos unha faciana ambivalente, por unha banda relixiosa de protector contra os feitizos e mal de ollo coa súa «oración de San Cipriano», e por outra como sabio patrón das artes máxicas ao que se lle atribúen obras máxicas en toda Europa, destacadamente o «Libro de San Cipriano» ou ciprianillo no noroeste peninsular. Xoga tamén un importante papel nas tradicións de desencantamento de tesouros, xa que o seu libro máxico conxugouse coas listas de tesouros que circulaban dende tempo atrás; e finalmente a difusión da súa figura por gran parte do mundo por mor das migracións.




    As conferencia pódese asistir de forma presencial ou pola internet a través da plataforma Falemos da Xunta de Galicia copiando no navegador a seguinte dirección:
https://falemos.xunta.gal/CCEU_MuseoEtnoloxico...
e o contrasinal: BibliotecaMER
O acceso a Falemos recomenda realizarse a través dos navegadores Google Chrome e Chromium tanto para equipos con Windows, Linux ou MacOs.
Se a conexión é desde un smartphone ou tablet hai que descargar a aplicación Jitsi Meet.
Entrada libre ata completar capacidade.
Observaranse as medidas de prevención establecidas na lexislación vixente ante a crise sanitaria ocasionada pola covid-19

miércoles, 20 de octubre de 2021

Días das Bibliotecas 2021. Ano Iberoamericano das Bibliotecas






Ás conferencias dos días 22 e 23 de outubro pódese asistir de forma presencial ou pola internet a través da plataforma Falemos da Xunta de Galicia copiando no navegador a seguinte dirección:


https://falemos.xunta.gal/CCEU_MuseoEtnoloxico_Conferencia_18102021 

e o contrasinal: BibliotecaMER


O acceso a Falemos recomenda realizarse a través dos navegadores Google Chrome e Chromium tanto para equipos con Windows, Linux ou MacOs.

Se a conexión é desde un smartphone ou tablet hai que descargar a aplicación Jitsi Meet.

Máis información:

http://bibliotecamuseoetnoloxico.blogspot.com/2021/10/dia-das-bibliotecas-2021-ano.html

 



jueves, 22 de julio de 2021

POESÍA ENRIBA!



POESÍA ENRIBA poesía performántica no patio do Museo Etnolóxico o venres 6 de agosto ás 21.30 h., entrada ata completar a capacidade.

No ano 2020 a poeta galega Olga Novo recibiu o Premio Nacional de Poesía e a poeta, tamén galega, concretamente de Ourense Alba Cid o Premio Nacional de Poesía Joven. Galicia, foi indicsutiblemente protagonista da Poesía a todos os niveis. Tamén en Ourense, presentouse no pasado mes de setembro,
o Festival de Arte e Poesía Explícita Imos ter máis que palabras o cal recibiu unha moi boa acollida de público e de opinións.


Ourense e toda a súa comarca, ten a sorte, de contar cun legado poético quedeixou un sinal a todos os niveis. Un legado que debemos ter presente, coidar, mostrar e non esquecer. Poetas coma Filomena Dato, Curros Enríquez, Celso Emilio Ferreiro, Blanco Amor, Otero Pedrayo, José Ángel Valente ou as irmás Pura e Dora Vázquez, etc. E tamén temos moi en conta a xeración de novas e novos poetas
como Myriam Reyes, Arancha Nogueira, Carlos da Aira, Rochi Nóvoa, Arancha Nogueira, Juan Manuel Vázquez, José Lameiras, Alfonso Rodríguez, Belem de Andrade, Nuria Erre Pe, Tamila Alem e un longo etc.


Por iso, esta proposta exclusiva para o Museo Etnolóxico: Poesía en Riba!, unha noite de Poesía Performántica na que participarán as poetas: Fátima Delgado, Lúa Mosquetera, Samuel Merino (Pompa e Boato), en directo coa música de Fernán Permuy e Rubén Mosquera.

Programa:

FÁTIMA DELGADO: presenta a performance poética e audiovisual OUVEOS.

LÚA MOSQUETERA + POMPA E BOATO + DOUS MÚSICOS EN ESCENA presentan a performance poético musical POMPETERA.

Para saber máis sobre as artistas que participan AQUÍ

Observaranse as medidas de prevención establecidas na lexislación vixente ante a crise sanitaria ocasionada pola covid-19.

jueves, 1 de julio de 2021

Marxes fílmicas 2021: Perú

 

 

Chega xullo 2021 e chega a décima edición do ciclo de cinema: Marxes Fílmicas este ano faremos un percorrido polas marxes do cinema peruano.

A cita será na primeira quincena de xullo: luns 5, mércores 7, luns 12 e mércores 14  ás 22.00 h no patio do Museo Etnolóxico, até completar a capacidade, de balde e en versión orixinal, coas medidas de hixiene e seguridade decretadas polas autoridades ante a pandemia da Covid-19.

Este ciclo, coma nas outras edicións, está elaborado polo Cine Clube Padre Feijoo de Ourense que tamén se encarga da proxección dos filmes. Como indican no seu blog a selección realizada, busca un híbrido representativo sobre os diferentes campos do cinema peruano: fórmula comercial, cinema de autor, filmes autoxestionados, xénero documetal e curtametraxes, con autoras e autores emerxentes e consagradas/os. "En base á selección destas catro cintas poderíase dicir que o cinema peruano de autor está a manter a tradición de poñer en evidencia os problemas da sociedade e non se encola ao discurso do mercado".

 

Luns 5 de xullo, 22.00 h.  
Bajo la piel (Perú, 1996) 110 min.
Dirixida por Francisco J. Lombardi. 


Un policía atípico, tímido e inseguro que rexeita a violencia é o encargado do posto de policía en Palle, unha vila do norte de Perú onde no pasado se desenvolveu a cultura dos Moches, o pobo máis sanguento da época Inca. A historia comeza cando se está a producir unha serie de crimes que seguen a tradición Moche. O policía, Percy, faise cargo da investigación contactando cunha patóloga española e cun profesor coñecedor da cultura Moche. As habilidades profesionais da patóloga puxeron a Percy no bo camiño do asasino. O contacto cada vez máis estreito entre a patóloga e Percy desata nel unha paixón amorosa e impulsos baixo a pel que non é quen de controlar. No entanto, a súa relación co asasino móstralle o lado escuro que todos levamos dentro durante millóns e millóns de anos.

Baseado nunha novela de Fiodor Dostoievski.

 

Mércores 7 de xullo, 22.00 h.  
Madeinusa (Perú, 2016) 100 min.
Dirixida por Claudia Llosa. 

Ambientada na vila ficticia de Manayaycuna ("a vila á que ninguén pode entrar" en quechua) nos Andes peruanos, a historia abrangue tres días na vida dos locais e dun foráneo de Lima. O foráneo non é benvido por mor de que a súa chegada cadrou co comezo do "Tempo Sagrado", un festival relixioso sincrético que vai desde o Venres Santo até a Pascua cristiá (festa moi interesante pola semllanza cos nosos entroidos).

Madeinusa é a historia dunha nena que vive nunha aldea perdida da cordilleira do Perú. Seguindo unha antiga tradición, os veciños desta aldea cren que, como Cristo está morto desde o Venres Santo até o Domingo de Resurrección, non os ve e, en consecuencia, durante ese tempo poden cometer calquera pecado sen remorso algún.
Premios
2006: Festival de Sundance: Selección Oficial (World Cinema)
2006: Festival de Rotterdam: Premio FIPRESCI
2006: Festival Mar del Plata: Mellor Película Latinoamericana

 

Luns 12 de xullo, 22.00 h.  
Las malas intenciones (Perú, 2011) 106 min.
Dirixida por Rosario García Montero. 


Cayetana, unha nena peruana de 8 anos, seica ten o mundo aos pés. Ela procede dunha familia de clase alta, e non lle faltan comida nin xoguetes, así como criados que a velan. A súa infancia ten lugar a principios dos anos 80 en Lima, cando a violencia terrorista comezaba a sacudir o país. 

Cayetana é moi intelixente, pero cunha personalidade algo escura. Os seus pais están separados. Despois de regresar dunha longa viaxe, a súa nai, Inés, dálle unha nova inesperada: está embarazada do seu novo mozo. Entón, o fráxil mundo de Cayetana derrúbase. A rapaza péchase no seu cuarto e declara que o día do nacemento do seu medio irmán será o día da súa propia morte. Só a súa imaxinación e a irrupción dos heroes nacionais dos seus textos escolares - Olaya, Grau, Bolognesi -, aos que admira, poderán salvala dun ambiente familiar cada vez máis alleo nun país ao bordo do colapso.

 

Mércores 14 de xullo, 22.00 h.  
Canción sin nombre (Perú, 2019) 97 min.
Dirixida por Melina León. 


O xornalista Pedro Campos (Tommy Párraga) investiga a misteriosa desaparición dun bebé acabado de nacer dunha muller de Ayacucho, Georgina Condori (Pamela Mendoza Arpi), que migra a Lima por mor do terrorismo que azota a súa rexión. Georgina busca axuda na comisaría e no pazo de xustiza sen atopala, mais chega ás oficinas do xornal local onde Pedro Campos toma o seu caso.



miércoles, 30 de junio de 2021

Exposición temporal: "Les Gens du Chemin. Peregrinación a Saintes Maries de la Mer" fotografías de Olga Seoane Paulus

 


 

A exposición “Les Gens du Chemin. Peregrinación a Saintes Maries de la Mer” producida polo Museo das Peregrinacións e de Santiago con fotografías de Olga Seoane Paulus, chega ao Museo Etnolóxico.
Esta mostra recolle a tradición vinculada á localidade de Saintes Maries de la Mer, situada no delta do Ródano, onde cada ano acoden milleiros de persoas peregrinas para render culto a santa María Salomé, santa María Xacobé e santa Sara.

Os rituais que teñen lugar así como o fervor das persoas que asisten, en boa medida pertencentes a etnia xitana de toda Europa e mesmo doutros continentes, supoñen unha riqueza cultural da tradición viva que incitou á autora a reunir durante cinco anos os materiais que conforman a exposición: auténticos documentos gráficos cheosde vida, colorido e devoción.

Segundo a tradición, algúns dos personaxes mais achegados a Cristo, fuxindo das persecucións de cristiáns fomentadas por Herodes Agripa en Terra Santa, toman un barco sen remos que o destino fai chegar ás costas meridionais da Galia. As diferentes versións apuntan a distintos pasaxeiros, pero todas coinciden en que viaxaban María Salomé, a nai de Santiago o Maior (Zebedeo) e de xoán; María Xacobé, nai de Santiago o Menor (Alfeo) ; e Sara, escrava ao servizo das anteriores. A morte das dúas Marías producirase nun breve intervalo de tempo e no lugar onde foron enterradas, San Trófimo, bispo de Arlés,levantaría cara o século XII e as peregrinacións xa bastante difundidas no século XIV.

De orixe palestina, africana ou da propia rexión da Camarga, Santa Sara é un dos personaxes máis enigmáticos e que deu orixe ás mais diversas lendas. A peregrinación xitana para honrar súa patroa convertese cada ano nun festival único, espiritual,vibrante e colorido, que reflexa a concepción da vida desta etnia e a súa condición orixinaria de pobo errante: LES GENS DU CHEMIN.

A peregrinación a este santuario da Provenza non está á marxe da peregrinación a Santiago de Compostela, xa que da veciña cidade de Arlés fan partir algúns autores a Vía Tolosana, que a súa vez conectaría coa Vía Francíxena que conduce a Roma. Sen dúbida boa parte dos peregrinos xacobeos e romeiros simultarían as súas peregrinacións a Santiago de Compostela e a Roma con peregrinacións ao Santuario de Nôtre Dame de la Meren Saintes Maries de la Mer.

Como mostra desta peregrinación o Museo Etnolóxico expón unha selección de 14 imaxes do proxecto, amosando a necesaria adaptación dunha tradición para á súa continuidade no tempo.

miércoles, 23 de junio de 2021

Inauguración da exposición "O viño en Galicia"

 





    O vindeiro venres 25 de xuño ás 19:30h terá lugar a inauguración da exposición "O viño en Galicia" na Alameda (Rúa Progreso) de Ribadavia

    Unha mostra producida polo Museo do Viño de Galicia con fotografías de Xurxo Lobato que celebra e presenta a viticultura e a enoloxía como como parte esencial do noso patrimonio.

    As imaxes amosan as diferentes Denominacións de Orixe e Indicacións Xeográficas Protexidas de Galicia, invitando a reflexionar sobre a existencia dun patrimonio común, pero destacando a diversidade dos seus caldos e cultura. As fotografías son quen de encapsular a cultura do viño, recollendo as diferentes paisaxes, arquitecturas, traballos e celebracións que orixínanse ao redor deste ben tan noso.

Unídevos a este brinde polo viño!


Observaranse as medidas de prevención establecidas na lexislación vixente ante a crise sanitaria ocasionada pola covid-19.