Museo Etnolóxico Ribadavia

Museo Etnolóxico Ribadavia
Vista do patio interior do Museo

miércoles, 23 de noviembre de 2016

Conversa no Museo con Vania López Arias: "A restauración do retablo maior de San Domingos de Ribadavia: criterios de intervención"




O próximo venres 25 de novembro, ás 20:15 h teremos no Museo Etnolóxico unha conversa con Vania López Arias sobre a restauración do retablo maior de San Domingos de Ribadavia: criterios de intervención.
Vania López Arias é licenciada en Belas Artes, especialidade de restauración pictórica, pola Universidade de Granada.
Dende hai dezasete anos está a desenvolver a súa actividade profesional con bens das Dioceses galegas, de museos e de particulares. Entre as súas intervencións están as efectuadas no Pórtico do Paraíso da Catedral de Ourense, no Baldaquino da Capela maior da Catedral de Lugo, ou na Cruz procesional do século XIII de San Munio da Veiga.
Na actualidade dirixe o Centro de Conservación e Restauración San Martiño da Diocese de Ourense. Dende o ano 2015, é membro da Comisión de Patrimonio da Diocese de Lugo.

miércoles, 16 de noviembre de 2016

Presentación do libro : "Anuncios. Historia del Comercio Orensano a través de la Publicidad 1863-1939"




Maribel Outeiriño autora do libro:  Anuncios. Historia del Comercio Orensano a través de la Publicidad 1863-1939 presentará o seu libro este venres 18 de novembro ás 20.15 h. no Museo Etnolóxico a vez que terá unha conversa sobre o seu traballo de recompilación de anuncios por distintas bibliotecas, arquivos e centros de documentación entre os que se encontra a Biblioteca do Museo Etnolóxico.

Neste libro-CD están recompilados moitos dos anuncios que aparecían por esas datas nos xornais que se editaban en Ribadavia, e que se conservan no Museo: "El Avia", "El Obrero", "El Ribadaviense", "El Noticiero del Avia", como exemplo estes que aparecen no libro de Maribel: sobre a venta de globos por parte do encuadernador Eduardo Gómez que aparecía no xornal El Avia en 1889, lembrar que en calqueira festa era moi habitual a solta de globos inclusive había concursos como aparece no programa das Festas do Portal de 1911, 



 ou o da fábrica de chocolates de Francisco Rodríguez anunciándose no xornal El Obrero en 1881 e explicando as súas innovacións e a excelente materia prima, así como o comercio de Fulgencio Lira situado na Praza Maior anunciando a chegada de novo material, e así podíamos seguir porque ademais dos anuncios que aparecen no libro no CD van incluídos máis de 300 anuncios de Ourense cidade e provincia.

miércoles, 2 de noviembre de 2016

Conversa no Museo con Begoña Ces Fernández: "O terremoto do 1/XI/1755 no Ribeiro"



O próximo venres 4 de novembro, ás 20:30 h teremos no Museo Etnolóxico unha conversa con Begoña Ces Fernández,  Arquitecta e Máster en Rehabilitación Arquitectónica pola Universidade da Coruña sobre os efectos no Ribeiro do coñecido como o Gran Terremoto de Lisboa.

Begoña Ces Fernández defendeu no ano 2015 a súa tese do doutoramento en Arquitectura na Universidade da Coruña, resultado dunha investigación desenvolvida durante os últimos cinco anos, na que estudou, dende o punto de vista construtivo e arquitectónico, os efectos do coñecido como O Gran Terremoto de Lisboa do 1 de novembro de 1755 sobre o patrimonio monumental galego. Entre os seus temas de investigación está o patrimonio arquitectónico, as patoloxías na construción, a historia da arquitectura e a sustentabilidade ambiental.

O seu interese polo patrimonio ourensán remóntase aos seus estudos de Mestrado, tendo escollido como tema do seu traballo de mestrado a evolución arquitectónica e os procesos de destrución e rehabilitación da igrexa do mosteiro cisterciense de Santa María de Melón.
A súa tese: Los efectos del seísmo de Lisboa de 1755 sobre el patrimonio monumental de Galicia, foi dirixida por Ramón J. Yzquierdo Perrín e titoriada por José Ramón Soraluce Blond, está dispoñible para a súa consulta no repositorio institucional da Universidade da Coruña, na seguinte ligazón permanente: http://hdl.handle.net/2183/15902.
 Begoña Ces fixo unha recensión da súa tese no blogue da Biblioteca do Museo que podedes consultar AQUÍ , ademais na Biblioteca do Museo depositou para consulta de toda as persoas interesadas, unha copia en papel da parte relativa aos efectos do Gran Terremoto de Lisboa no patrimonio arquitectónico da comarca do Ribeiro, e unha copia en CD-ROM da súa tese.

miércoles, 5 de octubre de 2016

Cine de outono: Miradas Etnográficas 4


 Neste 2016 as cuartas Miradas Etnográficas do ciclo Cine de Outono botan unha ollada cara algunhas poboacións que foron anegadas para construír encoros e como se enfrontan a esta situación as xentes que viven neses lugares de Galicia, de Rusia e da China.

As proxeccións serán de balde ás 20.30 h. no Museo Etnolóxico o venres 7, sábado 8, venres 14 e sábado 15 de outubro, coa colaboración do Cineclube Padre Feijoo de Ourense e a Federación de Cineclubes de Galicia.

Nas proxeccións dos filmes galegos:"Asolagados" e "Os días afogados" contaremos coa presenza da equipa de rodaxe dos filmes, cos que manteremos un coloquio para coñecer os pormenores da rodaxe e a súa experiencia con esta realidade, que tanto mudou as vidas das persoas que habitaron estes pobos anegados polos encoros de Belesar e do Lindoso.


Venres 7 de outubro, 20.30 h.

ASOLAGADOS
(Galicia, 2013). 60'
Director: David Vázquez

Documental sobre a xente e os seus pobos (Abideira, Porto, Castro Candaz, Santa Marta, Pincelo, Ponte fortes, A Samugueira, San Paio, Mourulle, Portomeñe, A Ermida, Ribó…), anegados polo encoro de Belesar en 1963. Imaxes e sons da Ribeira Sacra e do río Miño; dos restos das casas, das adegas, das árbores… e especialmente, dos dez testemuños que viviron nestes lugares antes da construción do salto e que se viron obrigados a deixalo todo.
Xa que logo este documental fai unha posta en valor das tradicións, costumes e labores que se facían na ribeira por medio das narracións que fan os nosos protagonistas de cómo era a vida antes e cómo é agora a carón do río.
Premios:
Primeiro premio Olhares e Enquadramentos do Festival RIOSde Vila Real (Portugal).


Sábado 8 de outubro, 20.30 h.


NATUREZA MORTA "Sanxia haoren"
(China, 2006). 108'
Director: Jia Zhang Ke

Tras a construción da presa das Tres Gargantas (China) a aldea de Fengjie foi anegada e os seus habitantes realoxados nunha nova localización. O mineiro Han Sanming regresa a Fengjie, logo de 16 anos de ausencia, na procura da súa muller. Tamén a enfermeira Shen Hong está na procura do seu home na aldea.
Premios:
León de Ouro á mellor película no Festival de Venecia de 2006.


Venres 14 de outubro, 20.30 h.


OS DÍAS AFOGADOS 
(Galicia, 2015). 86'
Directores: César Souto e Luis Avilés

En 1992, a construción do encoro do Lindoso (Portugal) anegou para sempre as aldeas ourensás de Aceredo e Buscalque (Ourense, Galicia). Os seus habitantes nada puideron facer para salvar as súas terras nin os seus fogares. Sabendo que todo estaba a piques de perderse, varios veciños colleron as súas cámaras domésticas e comezaron a gravar. As súas imaxes, recollidas desde mediados dos anos 60, constitúen un valioso documento histórico e etnográfico, filtrado pola subxectividade e as vivencias familiares. Son, ao mesmo tempo, un acto de fe nas posibilidades do cinema doméstico para dar conta do tempo histórico que nos toca vivir. Máis aló do íntimo, revélanse como un retrato dos mecanismos cos que actúa o poder. A tensión entre o existencial e o político, e entre o tempo pasado e a realidade presente, condicionan unha historia que se proxecta en múltiples sentidos máis aló de si mesma.
Premios:
Premio do Público e mención especial do xurado no Festival de cine doucumental de Cádiz ALCANCES 2016.  Premio UPTOFEST á Distribución. 



Sábado 15 de outubro, 20.30 h.




ADEUS A MATIORA "Proshchaine"

(Unión Soviética, 126'). 1983
Director: Elem Klimov 


Matiora é unha illa situada na parte central de Rusia, no medio dun gran río, que será anegada para facilitar a construción dun encoro. Esta é a historia dos seus habitantes, que teñen que despedirse do seu fogar, mais non é só a historia dunha pequena aldea senón que o director presenta e reflexiona sobre un problema de dimensións históricas: o conflito entre a sociedade moderna e a sociedade tradicional.
O filme está baseado na novela de Valentin Rasputin "O adeus a Matiora" (1976).

martes, 27 de septiembre de 2016

Outono Fotográfico 2016 no Museo Etnolóxico



Este 2016 o Museo Etnolóxico participa un ano máis no Outono Fotográfico nesta edición cunha exposición de fotografía de Demetrio Monteagudo González titulada: "Fogo Sagrado: fogo, festa, rito". que se poderá ver durante todo o mes de outubro no local social "Igrexa da Madalena".

HORARIO da igrexa da Madalena:
Martes a venres de 12:00 a 14:00 h. e de 17:00 a 19:00 h.
Sábados e domingos de 12:00 a 14:00 h.

Festivos pechado


foto de Demetrio Monteagudo González
O lume é un símbolo asociado á renovación e á purificación pero tamén ao castigo infernal. Aparece moitas veces coma o eixo sobre o que xiran moitas festividades e ritos da nosa terra. A festa, ademais, é algo que só existe onde hai presenza humana e é un fenómeno cultural universal. Cumpre importantes funcións nas nosas comunidades e funciona coma reforzador da identidade propia ao revelar as tradicións dun lugar.

O fogo é obxecto litúrxico no cristianismo pero tamén protagonista dos entroidos e doutras festas. Compón un calendario ígneo que se espalla por toda Galicia artellando as súas xentes e que Demetrio Monteagudo González recolle a través do seu obxectivo.

Demetrio Monteagudo González naceu en Vigo no ano 1952, a afección á fotografía espertóuselle no ano 1973, data dende a cal mantén coa fotografía unha relación autodidacta, intermitente e bipolar que se pode permitir pola súa condición de afeccionado.
O seu obxectivo son case sempre os temas de antropoloxía social, como as festas, as tradicións relixiosas ou os traballos tradicionais. Neste senso, nunca sentiu atracción pola fotografía de estudo.
Ten obra publicada na Gran Enciclopedia Gallega e na revista Río (2000-2004), colabora en publicidade empresarial. Mostrou a súa obra en varias exposicións, entre outras: no Centro Goianés (Goián, 1984), na Asociación Cultural «Eliseo Alonso», na Casa do Libro (Vigo, 2013) ou no Centro Goianés (Goián, 2013). No ano 2014 presentou no Museo Etnolóxico. Ribadavia, «Detrás da máscara», centrada no Entroido. É membro da Asociación Fotográfica Galega (Phosgalicia).
Folleto da exposición:


miércoles, 31 de agosto de 2016

Espazos sonoros 2016: Roteiro fluvial de Ribadavia a Francelos + concerto de Tres Pesos


Este ano 2016 o festival Espazos Sonoros: músicas en espazos de interese cultural desenvolve unha das súas actividades en Ribadavia, será o sábado 10 de setembro, consistirá nun roteiro fluvial de Ribadavia a Francelos e no concerto de Tres Pesos.

ROTEIRO FLUVIAL:
A xornada comenzará  as 15.00 h. co roteiro fluvial de Ribadavia a Francelos, unha ruta comentada para coñecer o noso patrimonio, a actividade é de balde mais é preciso facer unha inscrición antes do 7 de setembro.
Hora e lugar de encontro: 15.00 h, diante do Museo Etnolóxico de Ribadavia
Duración: 2 horas e media aprox.
Distancia: 8 km
Dificultade: baixa
Capacidade máxima: 70 persoas
Inscrición: do 27 de agosto ao 7 de setembro no correo: actividades@espazossonoros.org

Unha ruta que sairá do propio Museo Etnolóxico para seguir o camiño á beira do río Avia ata a pequena igrexa de San Xes de Francelos do século IX e a granxa vitivinícola de Outeiro, unha antiga explotación que data do século XII e que pertenceu aos monxes de Melón. 
Trátase, no seu conxunto, dunha paraxe de gran riqueza etnolóxica, natural e paisaxística, na que se observa unha fonda pegada da man transformadora das persoas que ao longo dos séculos traballaron e fixeron produtivas estas terras. O camiño conduciranos finalmente ata o Pociño de Francelos, as pozas naturais que forma o río Brul, tamén coñecido como río Outeiro, ao seu paso pola aldea. E de volta a Ribadavia.

Podedes ver o percorrido completo da ruta picando neste enlace AQUÍ .

CONCERTO:


Despois do roteiro a cita será ás 19.00 h. no Museo Etnolóxico co concerto do Tres Pesos música de raíz, música de hoxe.
Tres Pesos está formado por tres músicos de fonda traxectoria no eido da música tradicional: Felisa Segade na voz e percusións tradicionais, José Antonio Ferreira (Pepe de Calo) na gaita, clarinete, voz e percusións, Estevo Lamas no acordeón, voz e percusión. O proxecto nace en 2013 e sae a escena, por primeira vez, nun concerto realizado  nas festas de San Pedro do ano 2014, en Santiago de Compostela. Nese mesmo ano gravan o seu primeiro traballo, Acta fundacional, nos estudios da Radio Galega.
O concerto é de balde e non precisa inscrición.


Un anaquiño da actuación de Tres Pesos no patio do Museo Etnolóxico:

miércoles, 24 de agosto de 2016

"O nacemento do violonchelo": concerto de Ester Domingo Sancho



O NACEMENTO DO VIOLONCHELO

Ester Domingo Sancho
Violonchelo barroco

                        31 de agosto ás 20.30 h. no local social da "Igrexa da Madalena" Ribadavia

Gabriël Metsu, O Violonchelista (1665) Royal Collection Trust, Londres

No concerto: "O nacemento do violonchelo" a violonchelista Ester Domingo Sancho convídanos a unha viaxe polas músicas para violonchelo solo (sen acompañamento) dos séculos XVII e XVIII, cun programa cuxa vontade específica é mostrar o descubrimento naquela época do violonchelo como instrumento solista, e o nacemento, polo tanto, dun novo ideal sonoro. Para axudar a tal propósito do xeito máis fiel posible, escoitaremos estas músicas nun instrumento que, ademais de ter sido construído no ano 1739, conserva a montaxe orixinal propia do período barroco.  




Ester Domingo Sancho é unha entusiasta da música de cámara e orquestral, é co-fundadora de diversas agrupacións (Edelmann Trio, Apollo's Cabinet, El Almacén de Música, Cuarteto Tomás de Iriarte) coas que leva a cabo unha actividade concertística internacional. Paralelamente, ten a honra de colaborar con diversos grupos de prestixio como a Orquestra do Século XVIII, a Orchestra of the Age of Enlightenment, Holland Baroque, Musica Amphion, Los Músicos de su Alteza, La Madrileña, Camerata Antonio Soler e La Guirlande, xunto a músicos e directores da talla do lendario Frans Brüggen, Philippe Herreweghe, Jos van Immerseel, Alessandro Moccia, Margaret Faultless, Kati Debretzenyi, Rachel Podger ou Lars Ulrik Mortensen.




PROGRAMA



Giuseppe Maria dall' Abaco (1710-1805)



Capriccio Núm. 3 en mi bemol maior

Capriccio Núm. 4 en re menor    




Domenico Gabrielli (1659-1690)

Ricercar Núm. 2 en la menor
Ricercar Núm. 3 en re maior


Francesco Paolo Supriani (1678-1753)

Toccata X   


Johann Sebastian Bach (1685-1750)

Suite Núm. 2 en re menor, BWV 1008:
I. Prelude
II. Allemande
III. Courante
IV. Sarabande
V. Menuet I e II
VI. Gigue
Folla de man do concerto



Un pequeno momento do concerto de Ester Domingo Sancho (que nos desculpe a gravación de baixa calidade)

jueves, 18 de agosto de 2016

Exposición: A pesca fluvial a través da colección do Museo Etnolóxico



O venres 10 de xuño ás 20.30 h. inaugúrase no Museo Etnolóxico a exposición: "A pesca fluvial a través da colección do Museo Etnolóxico"; a través de bens procedentes das coleccións do Museo Etnolóxico. Ribadavia, agás catro fotografías aportadas por particulares, abórdase a evolución da pesca fluvial a través de dúas variables que se entrecruzan; a saber, unha, os cambios que levan da pesca fluvial practicada como actividade económica complementaria, a dos «pescantíns», ata a pesca entendida como manifestación cultural, a dos «troiteiros», ao socairo das transformacións mediaombietais e da progresiva normativización da actividade.


Relatado nun discurso construído con obxectos, fotografías e textos, articulado en artes naseiras –as máis antigas e que pasan de seren feitas con materia prima exclusivamente vexetal a recibir engadidos industriais-; artes redeiras –as de máis capacidade extractiva, evolucionan do emprego de fibras vexetais cara ao plástico-; as embarcaións –o barco de dornas, característica do Miño- e as artes de liña –na que se inclúe a pesca con cana e a súa transformación coa chegada dos carretes, das materias primas industriais e dos cambios na lexislación e as alteracións no curso do río-.
























Folleto da exposición tamén en castelán AQUÍ e en inglés AQUÍ